2012 жылдың 4 маусым күні Ақмол ауылының Мәдениет сарайында Целиноград аудандық жұмыспен қамту және әлеуметтік бағдарламалар бөлімі Мемлекеттік тілді дамыту қорының қолдауымен «Жүрегіммен көріп, жаныммен сезінемін» атты Халықаралық Балаларды қорғау күніне арналған мерекелік шара өткізді. Шара Ақмол ауылының мүгедек балаларына арнап ұйымдастырылды.
Мерекелік шараның мақсаты – мүгедек балалардың шығармашылық қабілеттіліктерін дамытып, туған елін танып білуге қызығушылықтарын арттыру, Отан сүйгіштікке тәрбиелеу және мемлекеттік тілді оқып, үйренуді ынталандыру.
Аталған шараға қатысқан барлық балаларға әлемдік классика шығармаларының қазақ тіліндегі үлгілері мен Мемлекеттік тілді дамыту қорының арнайы сыйлықтары тарту етілді.
Сонымен қатар, Қор 1 маусым — Халықаралық Балаларды қорғау күніне орай «Дарын» республикалық ғылыми-практикалық орталығының ұйымдастыруымен өткен жас суретшілер байқауында үздік нәтиже көрсеткен бірқатар оқушыларға бағалы сыйлықтар табыс етті.
