«Мемлекеттік тілді дамыту» қоры Астана Политехникалық колледжінде «Қазақша білесің бе? Досыңа үйрет!» атты жаңаша үлгідегі тіл байқауын бастады.

Байқаудың өткізілу тәртібімен таныстыру Қордың директоры Азат Шәуеев, «ҚАЗТЕСТ» Ұлттық тестілеу орталығының Басқарма бастығы Айдос Әбдіқалықов және Политехникалық колледжінің тәрбие ісі жөніндегі орынбасары Зәуреш Жүсіпованың қатысуымен өтті.

Байқаудың басты мақсаты – студент жастардың мемлекеттік тілді үйренуіне ықпал ету және оларды ынталандыру.

Байқаудың өту тәртібімен танысқан студенттер арасынан досыма қазақ тілін үйретемін және досымнан үйренемін деген жастар жұптары өз еріктерімен қатысуға ниет білдірді. Тіл үйретуші, яғни қазақ тілін жетік меңгерген студент (оқытушы) қазақ тілін білуге ықылас танытқан тіл үйренушіні (оқушы), өз досын немесе курстасын ортаға алып шықты.

Әрі қарай «ҚАЗТЕСТ» жүйесі арқылы «оқушылардың» қазақ тілін меңгеру деңгейі анықталды. Олар тіл үйренуге берілген екі ай ішінде ауызекі қазақ тілін үйреніп шығуы керек. Ал, екі айдан соң «ҚАЗТЕСТ» жүйесі және қазақ тілінде жеке әңгімелесу арқылы тіл үйренушілердің қазақ тілін қандай деңгейде меңгергені бағаланып, байқау жеңімпаздары анықталатын болады.

Жүлделі орындарды иеленген жастар Қордың арнайы дипломымен, бағалы сыйлықтарымен марапатталады.

Осындай байқау былтыр «Қазақстан-Ресей» университеті студенттерінің арасында өткізілген болатын. Байқау талабы бойынша берілген екі айдың ішінде бірнеше студент ауызекі қазақ тілін меңгеріп шығып, олардың үздіктері – менеджмент факульетінің 2 курс студенті Кристина Георбелидзе мен ақпараттану факульетінің 1 курс студенті Валерий Тен Қордың арнайы дипломымен және «алтын нөмірлі» ұялы телефондармен марапатталған болатын.