29 маусым күні Нұр-Сұлтан қаласында Мемлекеттік тілді дамыту қоры жас журналистерге арналған «Көркем SOYLE» медиа-тренингін өткізді. Тренингке 50-ден астам БАҚ өкілдері, радио және теледидар, ақпараттық агенттіктер, баспа және интернет басылымдарының журналистері қатысты.

Іс-шараның мақсаты – БАҚ-та мемлекеттік тілді қолдану сауаттылығын арттыру, тіл мәдениетін жетілдіру, тілді қолдану деңгейін көтеру және жас журналистердің кәсіби біліктілігін арттыруға қолдау көрсету.

Тренинг келесі тақырыптар бойынша өтті: «Қазіргі қазақ телевизиясында және радиожурналистикада мемлекеттік тілді қолдану мәселелері», «Қазақ тілі – қоғаммен байланыс құралы ретінде», «Эфирдегі харизма. Эфир этикасы. Шешендік өнер.», «PR технологиялардағы қазақ тілін қолдану ерекшеліктері».

Тренерлер ретінде белгілі тіл маманы Шерубай Құрманбайұлы, журналистика саласының жетекші мамандары Гүлжазира Берікқызы, Айза Аблаким, Мұхамед-Әли Болатұлы, Сымбат Талғатқызы болды.

Қатысушылар алдында сөйлеген сөзінде Мемлекеттік тілді дамыту қорының директоры Азат Шәуеев: «Біздің медиа-тренинг жас журналистердің біліктілігін арттыруға, мемлекетіміздегі кәсіби қазақтілді баспасөзді дамытуға, сөз бостандығы мен ой еркіндігін кеңейтуге бағытталған», — деп атап өтті.

Тренинг барысында қатысушылар қажетті және пайдалы ақпараттар, мамандардан өз сұрақтарына жауап алып, сондай-ақ өзара тәжірибе алмасып, пікір бөлісті. Соңында әр қатысушыға арнайы сертификаттар табысталды.