Қазақстан Республикасы Тұңғыш Президенті – Елбасының Қоры үздік қазақтілді интернет-сайт байқауына өтінімдер қабылдауды бастайды. Ұйымдастырушысы – Қазақстан Республикасы Тұңғыш Президенті – Елбасының Қоры жанындағы Мемлекеттік тілді дамыту қоры.
Байқау мақсаты – интернет жүйесіндегі үздік қазақтілді сайттарды анықтап, қолдау көрсету, ақпарат кеңістігінде қазақ тілінің қолданыс аясын кеңейту және интернеттегі қазақтілді контент үлесінің ұлғаюына ықпал ету.
Қазақ тіліндегі ең үздік сайттар байқауы осымен төртінші рет өткізілгелі отыр. Өткен үш жыл қорытындысы бойынша 25 отандық қазақтілді сайт байқау лауреаты атанып, ақшалай сыйлыққа ие болды.
Жеңімпаздар келесі номинациялар бойынша анықталады:
«Өткір тіл» — қазақ тілін және ұлттық құндылықтарды насихаттайтын үздік сайт;
«Рухани азық» – қазақ әдебиеті мен мәдениетін насихаттайтын үздік сайт;
«Терең ізденіс» — қазақ елінің тарихын насихаттайтын үздік сайт;
«Шынайы өмір» – қоғамдағы өзекті мәселелерді талқылайтын үздік сайт;
«Спорт тынысы» — салауатты өмір салты мен спортты насихаттайтын үздік сайт;
«Білім бұлағы» — білім беретін үздік сайт;
«Жастар әлемі» — жастарға арналған үздік сайт;
«Аймақ айнасы» — үздік аймақтық сайт;
«Балаларға базарлық» — балаларға арналған үздік сайт;
«Ойын-сауық» — үздік ойын-сауық сайты.
Әр номинация бойынша үздік сайтқа 385 мың теңге көлемінде ақшалай сыйлық тапсырылады. Байқау қорытындысы жыл соңында шығарылады.
Байқау жеңімпаздарын белгілі қоғам қайраткерлері, қаламгер-журналистер және байқау құрылтайшыларынан жасақталған қазылар алқасы анықтайды. Сайттың мазмұны, қызмет бағыты, интерактивтілігі, көркемдік жағы, идея ерекшелігі, қоғамға жалпы әсері – қазылар алқасы басшылыққа алатын негізгі өлшемдер.
Байқауға ғаламтор кеңістігіндегі тәжірибесі кемінде бір жылды құрайтын, қазақ тілінде ақпарат тарататын және қызмет түрі Қазақстан Республикасының қолданыстағы заңнамасына қайшы келмейтін кез-келген үкіметтік емес, тәуелсіз қоғамдық сайт қатыса алады. Байқауға мемлекеттік органдардың, шетелдік ұйымдардың, бұқаралық ақпарат құралдарының электронды нұсқалары (газет, тв, радио) қатыса алмайды.
Байқау ережесімен Қазақстан Республикасы Тұңғыш Президенті – Елбасы Қорының www.fpp.kz және Мемлекеттік тілді дамыту қорының www.qazaq-found.kz сайтынан танысуға болады.
Байқау өтінімдері Мемлекеттік тілді дамыту қорының info@qazaq-found.kz электронды мекенжайына 2019 жылдың 20 қыркүйегінен 20 қарашасына дейін қабылданады.
Байланыс телефоны: 8(7172)27-26-09
«Қазақстан Республикасы Тұңғыш Президенті – Елбасы Қорының Үздік қазақтілді интернет-сайт сыйлығы» байқауының
ЕРЕЖЕСІ
Жалпы ережелер
Осы Ереже Қазақстан Республикасы Тұңғыш Президенті – Елбасының Қоры тағайындаған үздік қазақтілді интернет-сайт сыйлығын беру тәртібін белгілейді (бұдан әрі «Сыйлық»).
Байқаудың мақсаты – интернет жүйесіндегі үздік қазақтілді ресурстарды анықтау мен насихаттауға, ақпараттық ресурстар мен сервистердің саны мен сапасын арттыруға, желі қолданушыларының қызығушылығын ұлғайтуға, ақпарат кеңістігінде қазақ тілінің қолданыс аясын кеңейтуге және үздіктердің танымалдылығын көтеруге ықпал ету.
Сыйлық құрылтайшысы – Қазақстан Республикасы Тұңғыш Президенті – Елбасының Қоры (бұдан әрі Сыйлық құрылтайшысы немесе Тұңғыш Президент Қоры).
Байқау ұйымдастырушысы – Мемлекеттік тілді дамыту қоры.
Байқаудың міндеті:
- Елімізде қазақ тілінде ақпарат таратып, қоғамдағы өзекті мәселелерді дер кезінде көтеріп, талдап-сараптап, өз оқырмандарына шынайы ақпарат жеткізуде белсенділік танытып жүрген үздік интернет ресурстарын қолдау;
- Қазақтілді интернет ресурстардың жұртшылықтың, өскелең ұрпақтың патриоттық сезіміне, тілі мен мәдениетіне, тарихына деген қызығушылықтарын қалыптастыру мен арттырудағы рөлін айқындау;
- Интернет қолданушыларын ақпараттық-коммуникациялық технологияны белсенді пайдалануға жұмылдыру.
Сыйлық мынадай номинациялар бойынша тағайындалады:
1) «Өткір тіл» – қазақ тілін және ұлттық құндылықтарды насихаттайтын үздік сайт;
2) «Рухани азық» – қазақ әдебиеті мен мәдениетін насихаттайтын үздік сайт;
3) «Терең ізденіс» – қазақ елінің тарихын насихаттайтын үздік сайт;
4) «Шынайы өмір» – қоғамдағы өзекті мәселелерді талқылайтын үздік сайт;
5) «Спорт тынысы» – салауатты өмір салты мен спортты насихаттайтын үздік сайт.
6) «Білім бұлағы» – білім беретін үздік сайт;
7) «Жастар әлемі» – жастарға арналған үздік сайт;
8) «Аймақ айнасы» – үздік аймақтық сайт;
9) «Балаларға базарлық» – үздік балаларға арналған сайт;
10) «Ойын сауық» – үздік ойын-сауық сайты.
Әрбір номинация бойынша жеңімпазға 385 мың теңге көлемінде ақшалай сыйлық тапсырылады.
Байқауға қатысушылар:
- Байқауға үкіметтік емес, тәуелсіз қоғамдық сайттар, ғаламтор кеңістігіндегі тәжірибесі кемінде бір жылды құрайтын, қазақ тілінде ақпарат тарататын және қызмет түрі Қазақстан Республикасының қолданыстағы заңнамасына қайшы келмейтін кез келген сайт қатыса алады. Байқауға мемлекеттік органдардың, шетелдік ұйымдардың, бұқаралық ақпарат құралдарының электронды нұсқалары (газет, тв, радио) қатыса алмайды.
Байқау талаптары:
- Сайт ақпараттарының тек қазақ тілінде таратылуы;
- Қазақ тілі мен ұлттық құндылықтардың дәріптелуі;
- Патриоттық тақырыптардың үздіксіз көтерілуі;
- Сайттағы материалдардың жиі жаңартылып отыруы;
- Сайтты қолданушылар саны;
- Жарияланған материалдардың қоғамда қызу талқыға түсуі;
- Сайт дизайнының портал ұстанымына сай безендірілуі;
- Әлеуметтік желілерге шығу мүмкіндігінің қамтамасыз етілуі есепке алынады және зерделенеді.
Байқауға қатысу үшін мынадай материалдар жолданады:
- сайттың домендік атауы;
- сайттың бас бетінің скриншоты;
- «Zero» рейтингтік компаниясы ұсынған сайт қолданушылары туралы бір айлық сандық көрсеткіш;
- сайттың бас редакторы мен ұжымы жөнінде қысқаша мәлімет;
- сайттың бағыты мен тарихы туралы қысқаша ақпарат;
- ұжымның қол жеткізген жетістіктері туралы мәлімет;
- патриоттық тақырыптарды белсенді насихаттау;
- сайт дизайнының безендіру сәйкестігі.
Жеңімпаздарды анықтау тәртібі
- Байқау жеңімпаздарын белгілі қоғам қайраткерлері, қаламгер-журналистер мен байқау құрылтайшыларынан жасақталған қазылар алқасы анықтайды.
- Қазылар Төрағасы мен құрамын Сыйлық Құрылтайшысы бекітеді.
- Байқауға өтінімдер тапсыру мерзімі – 2019 жылдың 20 қыркүйегінен 20 қарашасына дейін.
- Байқауға өтінімдер Мемлекеттік тілді дамыту қорының info@qazaq-found.kz электрондың мекенжайына жіберілуі тиіс.
- Өтінім жіберу және марапаттау рәсіміне қатысуға кететін шығындарды байқауға қатысушылар өздері көтереді.
- Марапаттау рәсімі Нұр-Сұлтан қаласында өтеді.
