Қазақстан халқы түгел қазақша сөйлеуі үшін әлі 10 жыл керек көрінеді. Бүгін премьер-министр Кәрім Мәсімов 2020 жылы еліміздің әрбір азаматы мемлекеттік тілде еркін сөйлеуі тиіс деп мәлімдеді. Ол үшін Үкімет тағы да мемлекеттік тілді дамыту бағдарламасын әзірлеп, тағы да қыруар ақша бөлуді жоспарлап отыр.
Кәрім Мәсімов, ҚР Премьер-министрі:
-Бізге биыл не істейтінімізді, келесі жылы қандай шаруа тындыратынымызды нақтылап беретін мемлекеттік тілді дамыту бағдарламасы қажет. Әрбір азамат енді 10 жылдан кейін қазақ тілінде еркін сөйлеуге міндетті!
Осылайша, мемлекеттік тілдің бұдан әрі қалай дамитыны енді Мәдениет министрлігі әзірлейтін жаңа бағдарламаға байланысты болмақ. Себебі 2001 жылы қабылданған құжаттың мерзімі биыл бітіп отыр. Ол бағдарлама шеңберінде мемлекеттік тілге деп талай қаржы бөлініп, талай шара ұйымдастырылғаны белгілі. Алайда бұл қаражаттың қалай жұмсалғанын тексеріп жатқандар көрінбейді. Ең өкініштісі, қазақ тілінің жайы болса, сол баяғы жартас – бір жартас күйінде қалып отырғаны жасырын емес. Мұның нақты мысалы ретінде әлі күнге дейін сәлемдесуден ары бара алмай отырған дәл осы Үкімет мүшелерін айтуға болады. Осыдан болса керек, Премьер-министр Кәрім Мәсімов жаңа қабылданатын бағдарлама нәтижелі болуы қажеттігін тапсырды. Мемлекеттік тілді дамыту мәселесі Үкіметтің 2020 жылға дейінгі жоспарындағы негізгі 3 бағыттың бірі болып отыр.
Нұржан Сабырұлы,
КТК