– Елбасы мақаласының орны бөлек. ХХІ ғасырда еліміз қандай болуы керек? Неге қол жеткізуге тиіспіз? Ол үшін не істемек керек? Осындай ауқымды мәселелер көтерілген. ХХІ ғасыр –басқа ғасыр. Бұл озық технологияның, кемелді білімнің, біліктіліктің заманы. Қазақстан алдына жаңа міндет қойып отыр. Ол – әлемдегі ең дамыған отыз мемлекеттің қатарына қосылу. Бұл жөнінде Елбасы «Қазақстан – 2050» стратегиясында, Бес институционалдық реформасында, биылғы «Қазақстанның үшінші жаңғыруы: Жаһандық бәсекеге қабілеттілік» Жолдауында айтып өткен. Ол деңгейге жету үшін алдымызда біраз міндеттер тұр. Елбасының «Болашаққа бағдар: рухани жаңғыру» мақаласында көрсетілгендей, ұлттық сана жаңғыру керек. Шындығы сол, кертартпа ескі қағидалардан арылатын кез туды. Бізге жаңаша ойлау, жаңа көзқарас қалыптастыру қажет. Қазір әлем технологиялық революцияны бастан кешіруде. Бұл бізге де келді. Жас ұрпақ соған сай білім алуы қажет. Елімізде өте жоғары деңгейдегі бірқатар университеттер ашылды, зияткерлік мектептер жүйесі қалыптасып үлгерді. Бұл – үлкен жетістік. Жастарды «Болашақ» бағдарламасы аясында шет елдің ең мықты оқу орындарында оқытып жатқанымыз тағы бар. Осы жерде айтпай кетпейтін бір мәселе, ол – еліміздің алдағы жылдары латын әліпбиіне көшуі. Мұны біз қуана қолдайтынымыз хақ. Мәселен, өзім жетекшілік ететін ұжым осы тіл мәселесімен шұғылданады. Сайтымызға тіркелгендер алпыс мыңның үстінде. Көбісі шетелде тұратын қандастарымыз. Сондықтан оларға арналған ақпарат, жаңалықтарымызды біз төте жазу және латын әліпбиіне аударып беріп келеміз. Егер Қазақстан латын әліпбиіне көшетін болса, тілдік бөгет алынып тасталар еді. Демек, алдағы уақытта осындай игі істерді атқару үшін, озық өркениетке жету үшін бізге береке-бірлік, еліміздегі ұлттардың ынтымағы қажет. Онсыз біз алға жылжи алмасымыз хақ.
Азат ШАУЕЕВ, Мемлекеттік тілді дамыту қорының директоры
https://aikyn.kz/2017/04/28/11711.html
