29 тамыз күні Орталық коммуникациялар қызметінде Мемлекеттік тілді дамыту қорының
директоры Азат Шауеевтің қатысуымен «#Soyle жобасы аясында жаңа бағаттар жүзеге асады» тақырыбында пресс-конференция өтті.
Қазақ тілін үйрету, насихаттау және қолданыс аясын кеңейту мақсатында «Samruk-Kazyna Trust» әлеуметтік жобаларды дамыту қоры Soyle жобасының аясында жаңа іс-шараларды жүзеге асырады: «Soyle.kz» әдістемесі бойнша Skype арқылы қазақ тілін үйрету және жаңа «Quzhat.kz» порталын әзірлеуді қолға алу. Жобаны іске асырушы — Мемлекеттік тілді дамыту қоры.
«Soyle» — тілдің қоғамдағы мәртебесін арттыру, қолданыс аясын кеңейту бағытында ғаламтор арқылы қазақ тілін тегін онлайн режимінде үйретуге арналған озық жоба. Жоба үш бағыт бойнша жүзеге асады: Soyle.kz порталын жетілдіру, «Soyle.kz» әдістемесі негізінде Skype арқылы қазақ тілін үйрету және жаңа «Quzhat.kz» порталын жасау.
Бүгінгі таңда Soyle.kz арқылы тіл үйренушілердің саны 45 мыңнан асты. Ашылғалы 2 жылдың ішінде еліміз бен шет елдерден 1 млн-ға жуық адам портал қызметін пайдаланған. Өткен жылы Android платформасында ашылған Soyle мобильдік қосымшасы арқылы 15 мыңнан астам пайдаланушы қазақ тілін үйреніп жатыр. Жақын уақытта IOS платформасында Soyle қосымшасы ашылмақ. Ыңғайлығын және функционалдылығын арттыру мақсатында «Soyle.kz» порталын одан әрі жетілдірілу жұмыстары жүргізіліп жатыр. Пайдаланушыларға қазақ тілін тереңдетіп оқытуға арналған жаңа сабақтар әзірленуде.
Екінші бағыт — «Soyle.kz» әдістемесі бойынша Skype арқылы қазақ тілін үйрету жобасы 1 қыркүйектен басталады. Skype арқылы оқытудың негізгі мақсаты – тыңдаушыларды қазақ тілінде емін-еркін сөйлесуге үйрету. Skype арқылы оқыту аз уақыттың ішінде тілді үйреніп, жоғары жетістіктерді көрсетуге мүмкіндік береді. Сабақтар сөздік қорды молайтуға, сөйлеу дағдыларын дамытуға бағытталған. Skype арқылы қазақ тілін
оқытудың артықшылықтары – уақыттың үнемделуі мен ыңғайлылығы. Сабақтарды үздік оқытушылар тегін өткізеді. Skype арқылы оқуға өтінімдерді Soyle.kz порталында қалдыруға болады.
Сондай-ақ, #Soyle жобасы аясында қызметкерлерге ресми іс-қағаздарын жүргізуді онлайн үйрететін тұңғыш — «Quzhat.kz» (іскери құжаттар үлгілері) интернет порталын әзірлеу қолға алынады.