республикалық форумында өзге этнос жастарының жанашыр үндері көп естілді.

Мәдениет және спорт министрлігі Тілдерді дамыту және қоғамдық-саяси жұмыс комитетінің ұйымдастыруымен Ш. Шаяхметов атындағы тілдерді дамытудың республикалық үйлестіру-әдістемелік орталығы «Тіл – татулық тірегі» атты этнос жастарының форумын Қызылжар өңірінде өткізді. Оған еліміздің барлық өңірлерінен келген делегаттармен қоса, Қазақстан халқы Ассамблеясының, министрліктің, «Жас Отан» жастар қанатының өкілдері, студенттер, бірнеше тілді еркін меңгерген этнос жастары қатысты. Айтулы шара Тәуелсіздігіміздің 25 жылдығына арналып, қазақ тілінің қолданыс аясын кеңейту, мәртебесін көтеру, мемлекеттік тілді білетін этнос жастарына қолдау көрсету мақсатын діттеді.

Салтанатты жиынды об­лыс әкімінің орынбасары Анархан Дүйсенова аш­ып, аймақ басшысының құт­тықтауын жеткізді. Мем­лекеттік тілді білу әр қазақ­стандықтың парызы, елге, жерге деген құрметтің бір белгісі екенін, талай ұлы­ларды дүниеге әкелген өлкеде маңызды мәселеге жан-жақты қолдау көрсетіліп келе жатқанын атап өтті.

Шараның «Тіл – татулық тірегі» деп аталуы ерекше мәнге ие екені осы жолы да анық байқалды. Әр халықтың басты байлығы, баға жетпес қазынасы ана тілі екені даусыз. Мемлекеттік тілдің күнделікті қолдану аясын кеңейтіп, оны шын мәніндегі қоғамдық қарым-қатынас тіліне айналдыру бүгінгі күн талабы екені талассыз шындық. Елбасы айтқандай, барша қазақстандықтарды біріктірудің басты фактор­ларының бірі еліміздің мем­­лекеттік тілін, барлық қазақстандықтардың ана тілін одан әрі дамытуға бар күш-жігерімізді жұмсауға тиіспіз.

Бұл орайда, мемлекеттік тілдің ұйыстырушылық, тұ­тастырушылық мәртебесін биіктетуде дарынды, белсенді, мақсаткер, заманауи жастарға зор сенім артылады. Форумда сөз алған шешендер өз ойларын осы тұрғыдан өрбітіп, тәуелсіз еліміздің шын патриоттары ретінде қазақ тілі мен мәдениетіне жанашыр көзқарастарын іспен дәлелдеп жүргенін айғақтады. Теміртау қаласындағы балабақшада спорт нұсқаушысы болып істейтін Нигара Пайзиеваның әңгімесі әсерлі шықты. Мек­тепті орысша бітірсе де, университетте қазақ тобында оқыпты. Қазақ, өзбек, орыс, ағылшын тілдерін еркін біледі. Оның ойынша, шын ниет қойған адамға тіл үйрену қиын емес. Ол жас патриоттарды қазақ халқының ұлттық рухында тәрбие жүр­генін мақтаныш санайтынын жеткізді.

Солтүстік Қазақстан облысының Белое орта мектебінде қазақ тілі мен әдебиеті пәндерінен сабақ беретін Светлана Ма­гуя­нова өз тәжірибесімен бө­лісті. Орыс мектебінде оқ­­ып жүріп, мемлекеттік тілде ұйымдастырылатын байқауларға, олимпиадаларға үзбей қатысудың арқасында қазақ тілін тез үйреніп алған. Қазақ тілі мен әдебиеті мұ­ғалімі болсам деген таудай талабы арқасында жергілікті жоғары оқу орнын ойдағыдай тәмамдаған. Оның домбыра тартатын, өлең жазатын қабілеті де бар екен. Оралдық Венера Суровцева, Ақмола об­лысынан келген Равиль Абулханов қазақ тіліне деген қамқорлық отбасы, ошақ қа­сы­нан басталатынын алға тартты.

Қазақстан халқы Ассам­блеясының баспасөз хат­шы­сы Құрманбек Қазан­басов, Тілдерді дамыту және қоғамдық-саяси жұ­мыс комитетінің басқарма жетекшісі Толқын Исақова қуатты мемлекеттің тұрақ­ты­лығы мен татулығына негіз­делген, ел бірлігінің бас­ты күші ретінде мемлекеттік тілдің мәртебесін арттыру, мерейін өсіру өз қолымызда десті.

Форум делегаттары елі­міздің жастарына үндеу қабылдап, игі істердің ұйыт­қысы болуға, тілдердің үш­тұғырлығы саясатын қолдауға шақырды. «100 нақты қадам» Ұлт Жоспарын жүзеге асыру жолында белсенділік танытатындарына, жаһандану үрдісінде рухани келісім мен қоғамдық тұрақтылықтың сақталарына сенім білдірді.

Форум аясында С. Мұ­қанов атындағы әмбебап-ғылыми кітапханада Тәуелсіздіктің 25 жылдығына арналып кітап көрмесі ұйым­дастырылды. Дөңгелек үс­тел мәжілісін модератор Т. Исақова жүргізіп отырды Сүлейман Карикович (Жам­был облысы), М. Әуезов атын­дағы ОҚМУ док­то­ран­ты Латиф Азиз (Шымкент), Мұрат Эйбов (Қызылорда), Сергей Агеев (Астана) талқыланған мәселелер бойынша пікірлер алмасып, тілге қатысты мәсе­лелерді байыптылықпен, парасаттылықпен шешу жолдарын ұсынды.

Халыққа қызмет көр­се­ту орталықтарында ұйым­дас­­­тырылған акцияларда келушілерге сұрақтар таратылып, қазақша білу деңгейіне зерттеу жүргізілді. Форумның логотипі жазылған жалаушалар, шарлар мен қаламдар тарту етілді.

– Әкем мен шешем 12 тіл біледі. Менің үйренгенім – әзірше бес тіл. Қазақ тілін жас^­тайымнан біліп өстім. Сөздік қоры өте бай тіл. Қазір неміс тілін игеріп жүрмін, – деді бізге Петропавл қала­сындағы №6637 әскери бөлім­нің қызметкері Феруз Намет. Осыған қарап-ақ тәуелсіз Қазақстанның бәсекеге қа­білетті өрендері қазақ тілі – мемлекеттік тіл, орыс тілі – ұлтаралық қатынас тілі, ағылшын тілі – жаһандық экономикаға ойдағыдай кірігу тілі екенін жете түсінетін аңғару қиын емес.

Осындайда «Қазағымның көктен күліп ай-күні, Бола­шақ­тың кеңи берсін айдыны. Көк аспанда көк жала­уы желбіреп, Ана тілдің асқақтасын айбыны» деген өлең жолдары ойға оралады.

https://egemen.kz/

Өмір ЕСҚАЛИ,

 «Егемен Қазақстан»

Солтүстік Қазақстан

Облысы