9 желтоқсан күні Астанада Мемлекеттік тілді дамыту қоры Қазақстан Республикасының Тәуелсіздік күніне орай «Менің Қазақстаным» мобильді қосымшасының тұсаукесер рәсімін өткізді. Бұл жоба Қазақстан Республикасының Президенті Н.Ә.Назарбаевтың тікелей қолдауымен, Елбасының «Жібек жолы» бейбітшілік сыйлығына алған қаржысына әзірленді.
«Менің Қазақстаным» — еліне, туған жеріне деген сүйіспеншілігі зор көпшілікке арналған мобильді қосымша. HD сапасындағы фотосуреттер жиынтығы: Елорда, Алматы қаласы, Қазақстан табиғаты, спорт, патриоттық, тарихи тақырыптағы суреттер, Қазақстан туы мен елтаңбасы бар түсқағаздар. Бұл қосымша арқылы еліміздің әнұранын тыңдап, рингтонға қосып қоюға, Қазақстан инфографикасымен танысуға, планшет және телефонды ландшафттық және портреттік режимге оңтайландыруға болады.
Бұл қосымшаыңғайлы да жедел интерфейс арқылы компьютер, смартфон, планшет экрандарын сан алуан суреттермен, түрлі тақырыптармен безендіруге мүмкіндік береді.
«Менің Қазақстаным» мобильді қосымшасы қазақ және орыс тілдерінде әзірленген, IOS және ANDROID платформаларында қолжетімді. Болашақта осы қосымшаның ағылшын тіліндегі нұсқасын жасау жоспарланып отыр.
Қызықты іс-шараға жиналғандар соңында мектеп-лицей дарындарының концертін тамашалады.