Омбыда қазақ тілін үйренуге ынта-жігер танытып жатқандар көбейіп келеді, дені жастар. Кейбірі тілді меңгеріп, Қазақстанға көшпек екен.
Азамат Хайдаркин — өрт сөндіруші. Жүрегі қазақ деп соққанымен, ана тілінде сөйлей алмайды. Қазір тілді үйренуге талпынып жүр. Ол қарқынды оқу технологиясымен білім беретін Шығыс және еуропалық тілдерді оқыту орталығына барады. «Мұнда Азамат сияқты қазақ тілін меңгеремін деп келушілер өте көп», — дейді мекеме мамандары.
АЗАМАТ ХАЙДАРКИН, ШЫҒЫС ЖӘНЕ ЕУРОПАЛЫҚ ТІЛДЕРДІ ОҚЫТУ ОРТАЛЫҒЫНЫҢ ТЫҢДАУШЫСЫ:
— Қонақта отырғанда тілекті өз тіліңде айтуға не жетсін! Ақсақалдарымыз да бір марқайып қалады.
Орталыққа келіп, қазақ тілін оқып жүргендердің бірі — Әлия Бейсенбаева. Ол — студент. Қолына дипломын алғаннан кейін Қазақстанға қоныс аудармақ ниетте. Сондықтан мемлекеттік тілді білу Әлия үшін өте маңызды.
ӘЛИЯ БЕЙСЕНОВА, ШЫҒЫС ЖӘНЕ ЕУРОПАЛЫҚ ТІЛДЕРДІ ОҚЫТУ ОРТАЛЫҒЫНЫҢ ТЫҢДАУШЫСЫ:
— Жаңа сабақ өткенде сөздердің қазақша тәржімасын біліп отырамын. Өйткені үйде ата-анам қазақ тілінде сөйлейді. Ал бұрын мен қазақшаны мүлдем меңгере алмайтын шығармын деп ойлайтынмын.
Қазақ тілін қарқынды оқыту технологиясы 3 жылға есептелген. Әр топқа 3-4 адамнан артық алынбайды. Әрқайсысымен жеке-жеке сабақ жүргізіледі. Әзірге нәтижесі жаман емес. Бір жылдың ішінде тыңдаушылардың дені ана тілінде сайрап шығады.
САРА МҰНАЕВА, ШЫҒЫС ЖӘНЕ ЕУРОПАЛЫҚ ТІЛДЕРДІ ОҚЫТУ ОРТАЛЫҒЫ ЖЕТЕКШІСІНІҢ ОРЫНБАСАРЫ:
— Біз серіктестерімізге, бізге көмектескен кісілерге көп рахмет айтамыз. Бірінші ол — Қазақстан Республикасының Омбыдағы консульдігіне, Мемлекеттік тілді дамыту қорына, барлықтарына көп рахмет айтамыз.
Лингвистикалық орталықта тұңғыш қазақ тобы 2009 жылы ашылған. Содан бері 100-ден астам адам ана тілін жетік меңгеріп шыққан. Тіпті, кейбірі емтихан тапсырып, Қазақстан Республикасының арнайы сертификаттарын алған.
Омбы
Зайнұр Байжігіт, Александра Игорева
Жетінші арна
http://tv7.kz/kz/news/show/724