Жағым талғанша қазақтың ғажап тілі жөнінде «біреулермен қарап жүріп таласам, біреулерге жол көрсетіп қарасам, біреулердің бетіне айтып кінәсін, ақиқатқа өз әлімше жол ашам» деп, тіліміздің ақ қанат қорғаушысы болып жүрген белгілі ғалым, қоғам қайраткері, Қазақстан халқы Ассамблеясының мүшесі, «Мемлекеттік тілді дамыту Президенттік қоры» қамқоршылар кеңесінің мүшесі, «Мемлекеттік тілге – құрмет» қоғамдық бірлестігінің, Алматы облыстық әзербайжан этномәдени бірлестігінің төрайымы Асылы Османның 70-ке толған мерейжасына арналған түрлі-түсті суреттермен безендірілген өмірдеректік кітап-альбом осылай аталады.

Қалың оқырманға ұсынып отыр­ған бұл үлкен еңбекте атауы атойлап тұрғандай «Қазағым барда мен бармын» сөзін ғұмырлық ұстанымы еткен Асылы Осман­ның өмір жолы мен шығар­ма­шы­лығы, егеменді ел болғаннан кей­ін­гі қазақ тілінің мәртебесі мен мерейін арттыруға сіңірген еңбегі мен қайраткерлігі жайлы кеңінен сөз болады. Бір кереметі, кітап бастан-аяқ тарих шежіресінен кө­рініс беретін деректі суреттермен сабақтас­ты­рыл­ған.

Алматы облысы әкімдігінің де­меушілігімен жарық көрген ғұ­мыр­намалық кітап-альбомның бет­ашары Қазақстанның Тұңғыш Пре­зиденті Нұрсұлтан Назар­баев­тың құттықтауымен ашыл­ған.

Қазақ тілінің жаршысы, ұлттар арасындағы дәнекер, елдестіруші әзербайжан қызы жайлы еліміздің маңдай алды зиялылары да өз жүрекжарды лебіздерін арнапты. БҰҰ Бас хатшысының орынбасары Қасымжомарт Тоқаев: «…әр тынысыңыз Отанға деген ма­хаб­батқа толы»…» деп ағынан жарылса, экс-Мемлекеттік хатшы Қанат Саудабаев: «Қазақ тілін қалтқысыз меңгеру бір басқа, сол тілдің бүгіні мен болашағы жолында аянбай, қай кезде де батыл бастама көтеру бір басқа» деп шынайы тілегін білдіреді. Ал бүгінде ҚР Президентінің Іс бас­қарушысы Серік Үмбетов әзер­байжан отбасында дүниеге келсе де, қай кезде де қазақ халқының сөзін сөйлеп, жыртысын жыртып жүрген, мемлекеттік тіл мерейленсе жаны жадырап, оның атына артық ауыз сөз айтыла қалса, қа­натымен су сепкен қарлығаштай шырылдайтынын алға тартса, Астана қаласының әкімі Иман­ғали Тасмағамбетов Асылы апай­дың жастайынан қатал қоғамның пәрменімен туған топырағынан жер аударылып, тағдырдың тау­қы­м­еті мен теперішін тартқанын, бірақ мейірбандықпен қарсы ал­ған қазақ халқының кең пейілі мен кемел парасатының, қолдап-қарай­ласуының нәтижесінде қа­тар­дан қалмай, түптің түбінде хал­қымыздың айбарлы да аяулы қыз­дарының біріне айналғанын мақтанышпен тілге тиек етеді. «…Дүйім жұртшылық сізді бүкіл саналы ғұмырын мемлекет және қоғам игілігіне арнаған, адам­гершілігі мол, кең пейілді жан ретінде таниды», деп Алматы қаласының әкімі А. Есімов өз ба­ға­сын берсе, Достық және Парасат орденді Асылы Әлиқызын Алматы облысының әкімі Аңсар Мұ­саханов қазақ тілінің мемлекеттік тіл ретінде мәртебесін көтеруге ерекше атсалысып жүрген патриот ретінде құрметтейтінін біл­ді­реді.

Аға ұрпақ өкілдері С.Зиманов, Қ.Қайсенов, С.Сартаев, Ә.Нұр­шайықов, Р.Сыздық, Ш.Сарыбаев, Т.Кәкішев, Б.Рамазанова, С.Қаб­долова, М.Мырзахметов, т.б. екі халықтың рухани қазынасын тел еміп өскен телқара қыз жайлы өз ниеттерін жет­кізсе, белгілі ақын­дар М.Әлімбаев, Т.Молдағалиев, Н.Лушникова, С.Тұрғынбеков, Қ.Аман­жолов, Ө.Оралбаев, т.б. сәулелі жыр шумақтарын сыйлайды. Қысқасы, Сансызбай Мәдиев құрастырып, Шахан Маханбетов көркемдеп, безендірген, «Елнұр» баспасында жарық көрген 361 беттік кітапты алып қарасаңыз, Асылы Осман жайлы тілек қос­паған қазақ зиялысы жоқ. Қы­зы­ғушылықпен ерінбей санап шық­қанда Елбасынан бастап 132 дуалы ауыз – еліміздің қоғам, мемлекет қайраткерлері, елім, жұртым дей­тін ұлт жанашырлары, халық қа­лау­лылары, жоо ректорлары, танымал ғалымдар, белгілі ақын-жа­зу­шылар, қоғамдық ұйым же­тек­ші­лері, кәсіпкерлер жылы ле­біз­дерін ар­напты. Оған мерейжас иесі жайлы әр жылдары жа­рия­ланған 21 ма­қаланы қосыңыз. Бұ­дан қазақ хал­қы, оның тілі десе таяқтан тай­сал­майтын, семсерден сес­кен­бей­тін, қазақ үшін ақ сөй­леп, адал кү­ліп, тағдырын теліген Асылы апай­ға деген қазақ хал­қы­ның көңілін, ол кісіге деген құр­метін байқау қиын емес.

Сонау алыстағы Қап тауында орын тепкен Грузияның Ахалкалак ауданында кіндік қаны там­ған­мен, бесіктен белі шықпай жатып-ақ солақай саясаттың құр­баны болып, небәрі үш жасында, 1944 жылдың қара күзінде Оң­түстік Қазақстан облысының Түл­кібас ауданына маңдай тіреген Асылы Әлиқызы өзі айтатын «көк­те Құдай, жерде қазақ жар болып жетілдік» демекші, осы топырақта өніп, өсіп, көркейіп, бүгінде қайсар қайраткерге айналды. Ендеше, Асылы апайымыз «Қазағым барда мен бармын» деп иек артса, біз де «қазақ халқы тұрғанда Асылы Осман да бар» деп жауап бергіміз келеді.

Гүлзейнеп СӘДІРҚЫЗЫ,
«Егемен Қазақстан»
Алматы