Ақыл-ой және рухани дамудың, қарым-қатынастың құралы ретінде қазақ тілін меңгеруге деген қызығушылық танытқан, лингвистикалық қатынаста дарынды оқушыларды қолдау және анықтау мақсатында Білім және ғылым министрлігінің «Дарын» республикалық ғылыми-практикалық орталығы Мемлекеттік тілді дамыту қорының қолдауымен өзге ұлт оқушылары арасында қазақ тілінен «Тіл – мемлекет тәуелсіздігінің символы» XІ республикалық қашықтық олимпиадасын үстіміздегі жылдың 28-29 наурыз аралығында Астана қаласында Нұр Орда мектеп-лицейінде өткізді.

Олимпиадаға 5-10 сыныптарда оқитын өзге ұлт өкілдерінің оқушылары қатысты. Олимпиада екі кезеңде өткізілді:

On-line режимінде өткен I кезеңге 2561 оқушы қатысты. Ең жоғары ұпай жинаған 167 оқушы олимпиаданың қорытынды кезеңіне қатысуға шақырылды.

Олимпиаданың жеңімпаздары мен жүлдегерлері түркітілді және орыстілді топтар бойынша қазылар алқасының шешімімен «Дарын» РҒПО-ның I, II, III дәрежелі дипломдары және грамоталарымен марапатталды. Барлық қатысушыларға Мемлекеттік тілді дамыту қорының сыйлықтары тапсырылды.

Мәдени іс-шаралар аясында олимпиадаға қатысушылар ҚР Ұлттық мұражайына саяхат жасады.

Іс-шара Мемлекеттік тілді дамыту қорының  әлеуметтік серіктесі – «Samruk-Kazyna Trust» қорымен бірге ұйымдастырылғанын атап өтеміз. Іс-шара барысында «Samruk-Kazyna Trust» қорының қызметі туралы ақпарат берілген буклеттер таратылды.

Анықтама:

Әлеуметтік серіктес – «Samruk-Kazyna Trust» – Қазақстан Республикасында қайырымдылық, әлеуметтік маңызы бар бағдарламалар мен жобаларды жүзеге асыратын, «Самұрық-Қазына» ұлттық әл-ауқат қоры компаниялар тобы жанындағы әлеуметтік жобаларды дамыту қоры.